中移動(941)動作都夠快，一收到風HGC(前身和記)埋緊香港寬頻(1310)身，傾緊收購，急急腳連夜公佈每股5.23元cash offer。 四大股東合計持有香港寬頻43.02%股權。目前，只有兩個大股東話會接受offer，好明顯兩個party未完全傾掂數，中移動已經急住出offer，分分鐘連盡職審查都做完未。 以快打慢，一方面顯出誠意，加快收購步伐，盡快同通訊事務局或競委會傾計，以滿足先決條件。一方面想HGC知難而退，唔好再晒時間資源落收購案度。 以每股5.23元計，香港寬頻估值68.57億，以2024財年經調整自由現金流6.2億計，PE為11.06倍。就而家個市況黎講，中移動自己個PE都係咁上下，呢個offer不過不失。 不過中移動喺公告話如果佢成功收購到，應該可以減低香港寬頻嘅利息支出，到時自由現金流就可以高啲。所以中移動個offer應該仲有水位提高。 至於HGC本身已經係香港固網營運商，收購香港寬頻肯定可以擴大市佔率，挑戰HKT。而且HGC上年已經同香港寬頻傾過收購，嗰時吹緊個收購估值係78億，高過而家中移動個價。而家就睇HGC幾時出招回應。 香港寬頻