近年我好少喺香港外面嘅咖啡店飲咖啡，原因係過往有啲唔太愉快嘅體驗。不知幾時開始，香港咖啡圈開始流行香港版嘅淺炒。當然，深定淺炒其實都係個人口味，無話啱定錯。但問題係，香港好多品牌嘅淺炒都炒唔熟，呢個情況喺咖啡店都好常見。對我嚟講，無論你嗰杯咖啡用咩豆，深定淺都好，只要炒唔熟，出現啲因為唔熟帶嚟嘅尖酸、澀味、青草味或者質感問題，我都即刻減100分。 其實將咖啡豆炒熟係最基本嘅要求，呢樣嘢同深淺無直接對等關係。我有飲過深炒嘅豆一樣唔熟，但相對難度高啲。當然，烘焙師有唔同嘅想法，可能追求某啲特定風味，但如果有部份烘焙師認為「唔熟嘅風味」係優質，所以專登保留，呢個點我個人唔接受，但我會尊重，原因係起碼佢地知自己做緊咩。 大家有冇試過喺出面買豆或者飲咖啡時，會覺得有尖酸、澀味、青草味，欠缺甜感同烘焙香氣？如果有，歡迎一齊分享。 如果大家有興趣，我有機會可講下點解咖啡生豆唔熟會有以上影響。 香港咖啡