十年前，將一架新車交付予一位一家之主 數年後某天，正值疫情，呢位客人打電話俾我，話唔需要用車了，想我同佢buy back同一架用咗十年嘅二手車。 照例約時間睇車，但客人話必須要喺夜晚八點前睇，好冇問題，當天我傍晚六點多去到客人停車場，睇車前隨口問兩句： 「呀而家轉咗要返夜班，係做乜嘢工呀？」 「我而家喺附近超市做理貨。」客人不徐不窒，平常地回答。 我望一望附近間超市，要落半層樓梯，市區大廈通道又窄，即係要搬餐懵，再望一望呢位瘦身型、以前做斯文行業嘅客人，心都痛埋： 「你嘅身型未必承受到呢份工作，一陣賺完用嚟睇醫生就麻煩啦」 「我知巴士公司最近有請兼職 ，冇牌都可以試，都有百幾蚊個鐘，返工地點又靈活，不如我聽日試吓幫你問？」 我自小做唔少粗重工作，知道客人中年要轉行，仲要勞動真心搞唔掂。結果第二日，我按巴士公司招聘廣告打電話去，問好基本資料就介紹客人去試。 呢件事已經係兩年前發生，呢兩年我間中都會諗起，亦會為佢有啲擔憂。 今日，再問候呢位前客人，得知原來佢已經成功轉職巴士司機，駕駛屋企附近嘅路線，而且已經習慣新嘅生活，咁我呢件心事，都終於可以放低。