政府今年推嘅「基建零售債券」首次出現認購不足額，只達到目標嘅89%，即係話幾乎你抽幾多都中(最多中100手)。好多人驚會跌破發行價，即時輸錢，係真唔係呀？ 今次「基債」息率得3.5%，一般認為唔夠吸引，喺銀行做定期都多過你啦。但問題係喺銀行係做3年定期高過佢？ 事實上，目前香港嘅yield curve係倒掛咗(見圖)，即係話短期息率高過長期息率(傳統上應該係愈長期息率愈高)，其中一個原因可能係市場預期未來會減息，你做3個月定期完咗後，想繼續做，但個息率可能做唔返之前咁高，反而愈做愈低。 坊間好多人解釋認購不足額，係因為未來減息預期有所降低，甚至話呢排IPO熱，啲錢去咗抽新股。姑勿論你噏嘜解釋都好，事實上而家政府3年期prevailing market yield只係做緊3厘左右，「基債」定價3.5厘已經係有溢價。12月6日，三年期外匯基金票據嘅孳息率只係3.08%。 所以估計「基債」上市嗰日，嗰價穏定咗之後(因為通常上市初時會好多孖展友沽貨，壓低咗個價)，股價唔會破發，分分鐘有餐茶飲。 基債