聖誕節，同老婆過香港行街，帶佢去睇吓我以前小學雞年代生活嘅地方。半山區嗰啲冇乜改變，但沙田市中心就變咗好多。 以前細個日日響新城市等校巴去九龍塘返學，去4樓大快活食早餐，去偉華中心食上海麵，而家裝修咗唔知幾多次之後啲嘢都唔同晒，我響新城市第三期裏面行都可以蕩失路。另外最誇張嘅係而家個道路網絡，開車的確係方便咗好多，響港珠澳口岸出發唔使30分鐘就去到沙田，然後响沙田行尖山隧道可以20分鐘出到去西九龍ELEMENTS，搞到我好似個大鄉里。 去到每個商場都係人山人海，食飯泊車去廁所都要排隊，每個人都好似好大壓力，而我腦𥚃面就成日都諗起My little Airport 嗰隻唱片 - 香港是個大商場。好在十幾年前決定過嚟澳門生活，叫做賺咗個生活，如果唔係留喺度都唔知點生存。