上年出社區老人科attachment， 係我第一次協助certify走咗嘅病人。 我自細都唔怕屍體唔怕鬼， 但係比十幾個家屬係房外望住嘅壓力， 我好怕。 大家都清楚呢個步驟係一場演出， 最緊要做得得體， 唔好喺家屬對依個時刻嘅回憶中留下污點。 我開始前先合埋眼， 跟住自己心跳數二十下； 再擘大眼， 大力吸一口氣， Hold住四秒， 然後大力呼氣。 心裏面我同自己講： 「呢啲表演我每日都做、我最在行；你叫我瞌埋眼去run一次我都搞得點！」 事後無人留意到我第一次幫手做呢啲嘢。