之前講過喜歡驗舊樓，因為當中有機會得知好多人的故事，所見所聞，今日就分享一個小故事俾大家。 今日去到呢間屋，屋中每個角落都充滿了三個小朋友青年人的相片，但剩下的只有兩位聲稱70歲+的活潑精靈老人家。原來兩位老人家已經養大了三個仔女，最細的都已經大學畢業工作了幾年了，佢哋都已經搬離了倫敦甚至離開了英國了，老伯話上一次見到個女已經係3年幾前，當時係個女專登車野去佢哋個車房儲物，之後就再無見過。 佢哋話仔大仔世界，佢兩個的責任已經完成，所以決定賣左間大樓，之後車番晒d雜物去個女屋企，同個女一齊住夠佢一兩個星期，之後就再實踐佢哋的大計。 兩個老人家笑笑口後就開始講佢哋的大計，因為佢哋有旅行車，所以會先去英國的北部甚至蘇格蘭過冬，到春天就會慢慢南下，甚至過埋歐洲，佢哋話會起碼用兩年時間去旅行，去接觸更多更多的地方，可能到時就會搵到一個佢哋認為安老的地方。 佢哋話養仔女時根本就無咩時間去享受生活享受大自然，依家一定要玩番夠本。回想番以前，為了工作成日都離鄉別井，陪伴屋企人的時間非常有限，依家到了英國可以盡情陪伴太太及小朋友，但仍然掛住遠方的父母及親人，希望將來可以有更多更好的相聚時間。