The Last Dance 破·地獄     2024 幾有情意結嘅一套電影，因為細個就係住喺距離電影裏面嗰間殯儀館唔算太遠嘅地方，阿爺過身嘅時候都喺嗰度出殯，甚至以前有段時間返夜班，每晚收工都會經過。 不過講真，劇本處理得唔算出色，故事本身已經比較平凡普通，主線以外想講嘅嘢又多，無法兼顧下反而呈現一種鬆散。 至於網上所謂驚為天人嘅電影金句，都只係一啲老生常談，完全唔明白可以有幾“金句”？ 電影真正、唯一成功嘅，係搵啱演員。 單純睇電影本身質素，收到三千萬已經贏咗，而家票房前面多出嚟嗰個“一”字，其實係一班演員嘅功勞，感動觀眾、打動觀眾嘅係一班演員嘅配合同演技，甚至可以話係佢哋令到一個原本平平無奇嘅劇本，發揮到極限。 或者舉個例子去形容：同樣一部性能一般嘅房車，駕駛者係我抑或冼拿，都可以好唔同啦😜 所以整體嚟講，我欣賞嘅、我鍾意嘅係一班演員嘅演出，唔係電影本身。