繼續 福島 3. 海嘯是天災，核爆是人禍 《死腳膠》節目組話福島第一核電廠考察團已經停辦，其實係有方法去到的，不過全程唔容許帶電子產品同拍攝。考察團由東京電力職員帶領及講解，除咗講述事故起因，亦大篇幅解釋事故後嘅處理工作。團隊出入核電廠時會經過輻射探測器，亦要全程戴住測量儀，確保唔會將污染物質帶離核電廠範圍。考察團主要時間喺車上導覽，而去到1至4號反應爐對面大約100米嘅平台，就可以落車觀察機組現況，從外部了解佢哋分別用緊乜嘢措施去控制輻射洩漏同清除核廢料。 人生本身都冇乜幾可參觀核電廠，去一個出過事故、重補救緊嘅就更萬中無一。福島第一核電廠原本係發電嘅地方，事故後原地改建進行災後處理，當中大部分地方用嚟貯存及過濾污水，所以參觀沿途都會見到好多巨型水缸。 全程參觀其實十分平靜，反而完場後Q&A環節更加衝擊。有同行者問到事故對東電最大嘅教訓係咩，職員就回答係認真計算風險。風險二字令我不禁追問：「所以東電建廠時，其實係預計過有海嘯嗎？」 「⋯⋯是的。」 東電建廠時剷平崖邊，將1至4號機建於海拔10米高嘅位置，後備電源設於地下室。結果311大地震引發嘅海嘯，係15米。 待續