前幾日終於睇咗，話哂都叫全城期待，香港票房都過咗億四，即管講吓個人觀後感 近十幾廿年來港產片好少有呢類講殯儀同生死題材嘅戲有人肯投資拍，今次仲要有咁嘅卡士陣容，我自然都好期待個劇本夠唔夠紮實.....基本上係算幾好幾流暢，不過中段三個分段故事落墨比較少，有啲蜻蜓點水草草收場嘅感覺，當然亦睇到三個故事嘅主角(韋羅莎，金燕玲，梁雍婷)靠演技補救返，韋羅莎係香港舞台劇劇后級人馬，比較少睇佢有份做嘅戲，但係佢戲入面表現到一個兒子離世憶子成狂嘅媽媽用盡方法可以永隨左右嘅失落，無助，歇斯底里嘅心態，金燕玲亦係影后級人馬演技無需多講，佢同衛詩雅嗰段熟客/家人關係其實應該再講深入一啲，至於梁雍婷，應該係新一代女演員其中一位好有潛質可以彈起嘅生力軍 講到主角方面，一代笑匠Hello 文(🤣) 難得自8年前拍過一套台灣電影"一路順風" 之後另一套好正經唔刻意攪笑嘅戲，有新鮮感，戲入面同子女兩代因為傳統思想有别嘅衝突，直到片尾死前發現因為自己嘅固執同家人關係鬧翻而後悔，釋懷繼而補救，演技功力無容置疑 留言繼續 #破地獄