時間：weekday lunch hour 地點：金鐘某花膠米粉小店 事件：金鐘lunch hour尾聲，office放飯嘅食客大部分都已經食完埋單走人，我係尾圍用膳嗰班，由4人枱搭咗3枱客食到全枱得返我一個嘅時候，有個攞住名店紙袋嘅闊太打扮女士行入嚟，坐低準備叫嘢食，咁呢間餐廳啲米粉就好貼心有大、細碗揀嘅，闊太連袋都未擺低，就急不及待指住menu同店員落單：要呢個花膠湯米呀唔該，店員問佢要大碗定細碗，佢秒回「大碗」，跟住補咗句「少啲米粉」（咦？） 可能本人比較少出街食飯，呢個叫法都幾新穎，心諗：大碗少米粉其實係咪即係細碗？但係店員又無試圖糾正闊太，只係默默咁去入機，仲氣定神閒咁複述「大碗花膠湯米少米」一次。 可惜呢個時候我已經食完自己碗粉，無辦法見識嗰碗「大碗花膠湯米少米」除咗隻碗大啲之外，同我啱啱食完嗰碗細碗花膠湯米有咩分別，如果有人知道嘅話，可唔可以分享吓？