記情緒化的一天。 呢一個星期，每日都有喊，俾自己absorb情緒。每日都要自己出街行下，要搵朋友傾計。唔需要多，一日比一日好少少，一日比一日淡淡然就得。我以為自己還好。 今日嘅情緒好似去左另一個stage。 海浪回來得更洶湧，掀起更深的感受。 早上大哭，問上天點解要攞走佢，可唔可以俾返我？我用廿年命換返個健康嘅佢返黎，可以嗎？ （我知無可能） 同平時嘅喊唔同，今次我calm 唔到自己。平時見到陽光，會覺得男朋友就喺隔離，佢望住我咁傷心一定會好心痛，我就會慢慢靜落嚟。今日陽光普照，但我都做唔到，情緒仲喺到，我拉唔到自己出黎。我即刻打俾朋友。好感恩好朋友有聽電話，聽我喊，聽我講。同佢傾左一陣，我先平靜到。 我真的，差點遇溺。究竟點樣，先可以在思念的海洋中生存？ 我以為，今日已經喊完。 下晝，整今年嘅貓貓月曆。在手機搵相期間，睇到男朋友嘅相，我地都笑得好開心。無論係健康還是生病，佢面上都總係掛住笑容。本身想用一張同佢屋企人同貓貓一齊影嘅全家福，但我最後都係默默remove左佢。眼淚又再流下來。 夜晚，唔小心再睇到佢嘅同事在Facebook悼念佢，大家都話好可惜，去完追思會訓唔著。我又哭了。