今日見咗個叫Tom嘅自閉症小朋友，佢唔識講嘢，理解能力同一歲小朋友差唔多。 媽媽兩年前開始懷疑佢聽唔到嘢，但老師話好多自閉症小朋友都對自己名、同人溝通冇咩反應。媽媽直覺覺得佢真係聽力有問題，於是佢開始排期做聽力評估。 因為英國公立服務NHS要排好一段時間，於是佢帶咗Tom去睇私家聽力學家，但佢對人或者周圍事物都冇咩興趣，連掂佢嘅耳仔都好難，所以做唔到評估。 媽媽再帶佢去睇另一個私家聽力學家，結果一樣，不過今次就轉介咗佢去英國一間好出名嘅兒童醫院，但好可惜地個轉介被拒絕咗。 媽媽冇放棄到，決定去嗰間醫院自費做評估，但今次一樣冇結果。由於已經試過三次評估冇結果，間醫院肯幫佢做另一種測試：呢一種測試係要個小朋友進入睡眠狀態下去做，Tom就接受全身麻醉，然後喺佢個頭上面貼上electrodes，去量度個腦對於唔同音頻嘅反應。 結果發現，原來Tom兩隻耳仔都有嚴重聽障，個嚴重程度大概係拎個開著嘅電鑽喺佢耳仔旁邊，個音量佢都只係僅僅聽到。一確認有聽障之後，佢好快就有助聽器、排到人工耳蝸評估等，而佢只係帶咗助聽器短短一個月左右，媽媽已經發現佢對環境聲音、對自己名嘅反應多咗。