講真我係真心好想將一啲正面嘅價值去帶俾人，為人帶來救贖、鼓勵，並喺音樂創作嘅大道上一路高歌，而唔係創造出一個自怨自艾嘅同溫層載浮載沉。 但到目前為止，我都好似缺咗一啲嘢，缺咗一塊關鍵嘅拼圖。 喺處理「自己為他人帶來嘅感覺」(即氣場)呢件事上，其實我做咗好多改變。以前有好多人話我個樣有陣好濃嘅抑鬱味，甚至有frd話我冇表情嘅時候會形成一個生人勿近嘅殺人氣場，連我啊媽有時都會話我有啲表情好有威嚴嚇親佢。所以我培養咗一個時不時伸脷同周街唱歌嘅習慣，搞吓笑等啲人冇咁驚我。 另外就係聽過我講嘢嘅人都知我講嘢會窒窒吓同有啲口音，其實我係扮暴龍哥整出嚟嘅，我正常講嘢咬字會嚴肅到令其他人唔敢講笑，所以我特登加返啲青澀同幽默嘅效果落去。 寫呢段文字並唔係話我付出咗幾多或者有幾慘要人可憐我。事實上我都唔係好寂寞，純粹係唔清楚要點做，所以將迷惘寫出來。 我唔想其他人係因為見到我好努力去善待他人，所以先勉強同我做朋友。我想令自身嘅存在能夠自然地為人帶來喜樂。 我缺嘅係一句話？一段經歷？ 到底有咩可以令我頓悟呢？