（二十六）跑馬地蓮園之霞姐傳奇 我讀跑馬地立本幼稚園（以前電車總站對面），以前好多港島人都會入跑馬地食晚飯宵夜飲糖水，於90年代末初嘗呢間人氣明星宵夜店，亦初次認識（見識）到霞姐之專業態度及霸氣。 霞姐愛恨分明乃性情中人嘅表表姐，佢從來冇鬧過我，可能因為我識同佢相處，亦真係欣賞佢嘅出品，一油炸鬼一定新鮮炸所以佢嘅炸兩好脆好好食，二佢嘅裹蒸糭又係好多料好軟糯好好食，三係我最鍾意食嘅秘製咖喱雞撈麵，佢嘅麵底可能仲有少少鹼水，所以當你落咖喱汁去撈佢嘅時候，本身咖喱嘅黃色落咗個麵度個面會變成好曖昧嘅紫粉紅色，但係我覺得呢種化學反應好正，當然亦因為好好味啦，所以基本上經常都會食佢。 霞姐有單嘢一定要同大家講吓，當年李擦膠因為8號仔而累到全港股民輸到hi hi，佢嗰時喺舖頭對面街見到李生行緊去上自己架車，佢即刻衝出去舖頭講晒粗口指住佢追過去瘋狂媽叉佢，鬧佢累到全世界輸咗啲老本同退休金，所以佢應該係當面幫全香港蟹民聲討嘅其中一人。仲有佢對熟客特別係明星嘅態度係非常好，所以佢鬧過你你明啦！ 近10年冇再去過喇，有機會再返去試吓。