【幸福研究】哈佛75年研究：人生最重要嘅唔係錢！ 「有錢冇錢，開心就好！」咁講梗係人人都識，但真係咁簡單？哈佛大學做咗個長達75年嘅研究，追蹤724個男人一生，想知道到底乜嘢先至係人生最重要。大部分都話希望升官發財，但結果發現，原來有錢有名都唔及良好嘅人際關係重要！ 研究發現三個重點： 社交連結好重要，孤獨會大大損害健康。研究發現越多社交連結嘅人，身體狀況同精神狀態都會更好，壽命都會更長。相反，孤獨嘅人身體會較早衰退，大腦功能都會較快退化。 唔係朋友多就得，質素先最緊要。有啲人以為識好多朋友就等於幸福，但研究發現最重要係關係嘅質素。例如夫妻如果成日鬧交互相攻擊，對健康嘅影響可能仲差過離婚。 好嘅關係唔止保護身體，仲可以保護大腦。研究發現到咗80歲，同伴侶關係穩定嘅人，記憶力會更好。就算有時會拗撬，只要覺得對方係可靠嘅伴侶，都唔會影響到腦部功能。 最有趣係，研究發現50歲嗰陣同伴侶關係最好嘅人，到80歲都特別健康！就算有周身病痛，心情都幾好。相反，關係差嘅反而痛楚會因為情緒問題而加劇。 所以錢真係解決唔到所有問題。與其不停追求財富同成就，不如花多啲時間同家人朋友相處。