Boxing Day能夠睇到一場咁好嘅show，真係今年最好嘅禮物。 今次舞台同燈光效果都係我今年睇過最驚艷嘅製作。龐然巨爪一爪爪撕開YOASOBI字樣「布幕」，Ayase同Ikura隨即登場，好似拆禮物咁揭開呢個show嘅序幕；《優しい彗星》嘅漫天星光、《HEARTBEAT》將群眾live feed配合歌詞字幕、《IDOL》最後一鏡以Ikura舉起右手嘅背影配合歌名Typography，再配合五光十色嘅光束，看似簡單但睇出滿滿心思🤍 Ayase同Ikura一貫落力，Ayase玩到後段成個頭真係濕到輕輕扭一扭都會擰出水嗰一種（sldpk），Ikura成個幾兩個鐘冇飲過水啲高音都係一嘢就上到。《The Book Vol.1》必聽嘅歌都幾乎玩晒咁滯，最開心係聽到我最喜歡嘅《あの夢をなぞって》，上次Clockenflap冇玩到，今次親耳聽到現場演出，成件事真係同首歌一樣，就好似一場期待以久嘅夏祭煙火大會，一個夢見過嘅未來真係實現咗咁，聽到副歌莫名奇妙有啲眼濕濕🥹 音樂本來就係一種語言，YOASOBI嘅live每個節奏、每個音色，無論識唔識日文，都一樣可以認出佢哋如同群青般豔麗嘅色彩。