2024年即將結束…回眸今年都過得叫做不過不失啦，最開心嘅就係終於有機會可以同老婆彌補返當年因為疫情而一直延期嘅新婚旅行。 呢一年發生嘅事都唔算少，生活上亦有着好多嘅轉變，身邊唔少人人作出咗人生重大決定，無論去或留都希望大家可以搵到自己想要嘅嘢。亦都好感恩今年身邊嘅人大多數都係身體健健康康，小朋友幸福快樂成長，之前定下嘅年度目標亦都一一達成，但係有啲嘢嘅成效未如理想，要繼續努力。 2025年再為自己定下新嘅目標，其中一個雖然而家都開始緊，但係都仲未可以編排好時間同心機做好佢，希望自己來年會有更多時間同心機去拍短片講解一啲有關自己對運動，營養同埋健康嘅心得，或者係分享一啲以前做救護員嘅趣聞，希望將自己嘅故事分享出去，雖然未必人鍾意知😂，但係都起碼叫做為自己人生中留下一啲即刻回味嘅紀錄。 希望大家2025年繼續搵到自己嘅方向同目標，過得開開心心健康快樂。 健康第一