誤判 雖然一路睇覺得條橋似《毒舌大狀》，但又真係有真人真事支持。而甄子丹年過60嚟講都仲打，真係已經好勁！當然比全盛時期一定有段距離，但呢個年紀，真係冇得彈㗎喇！ 成套戲節奏明快冇悶場，對白都寫得唔錯，用律政司去切入感覺都新鮮。 當然丹爺未必做到黃子華嗰種咁字字珠璣同有說服力，睇嘅時候我會諗佢講對白係咪有設計過要特登斷開lag機，但以一個武打演員嚟講，都算唔錯。而MC做呢個角色都幾出乎我意料，竟然MC都有打戲？當然《我談》嘅角色一定比較適合佢，但又唔會話佢喺呢套戲唔好睇嘅。而其他老戲骨當然都係做返應有嘅演出。 《誤判》雖然係有《毒舌》嘅影子，但都有新鮮嘅地方，有啲人覺得喺講法庭嘅戲加入打鬥場面突兀，但我都覺得還好，亦都係有劇情而打，並非無緣無故，而且都會睇得幾肉緊。加上甄子丹都年過60，仲要着住西裝打，都真係值得入場支持。 而場景方面，港鐵景還原度極高，我睇嘅時候仲以為係凌晨時份去取景。 唯一覺得出戲嘅地方：有部分場口都係用咗配音，同口形完全對唔上，或者都係商業考慮？！