一個人坐低食緊碗車仔麵 跟住又一男一女坐咗喺我對面 就咁聽似係佢哋同事關係（但係大家啲對話又似flirt緊) 男:見係你請你食飯啦 女:做乜咁好死 男:呢間真係好好食，你陣間試吓佢個麻辣醬 女:我都唔食辣嘅，我想要清湯(跟住好似搵咗好耐都未搵到清湯兩個字) 男:你係咪盲㗎？真係文盲嚟㗎喎！呢度咪係囉 女:收皮啦你！頭先我見唔到咋嘛（作狀打一打對方） 隔咗一陣男仔碗麵到咗….. 男:呢個沙嗲湯底真係好好食㗎，你試一啖啦 女:我冇匙羹！一陣先啦！ 男:用我嗰隻咪得囉 女:唔啦，費事要你食個口水尾 男:是但啦，冇所謂 然後二人有講有笑好開心 由於我全程帶住頂帽 我係一路低頭食麵睇唔到佢哋個樣 只係聽佢哋啲對話覺得咁青春好可愛 就有少少好奇佢哋個樣 原來個樣都唔係重點 重點係佢哋兩個個頭嘅乾淨程度 我覺得佢哋係好有緣份 甚至可能係命中注定天作之合 以依家呢個天氣 目測二人嘅頭油同頭皮分佈 應該至少5日以上冇洗頭