2024-12-31 16:03
近年越黎越唔興倒數,今晚只係同老婆買盒爭鮮,開枝白酒,一邊氹個女訓覺,一邊回顧呢一年嘅生活。
今年最開心就係年初裝修間屋期間收到個女將會加入家庭嘅好消息,佢嘅出現好似幫我屋企所有人都注入左新動力,而我做嘅一切又好似剛好為佢準備好一個成長環境,而我亦好享受做左老豆後嘅生活,每日暫時同佢嘰咕嘰咕咁講野都好開心。
呢年有好多好朋友都選擇同另一半成婚,我好慶幸
都可以參與到,我一直認為搵到個可以互相扶持到嘅人比好多功名成利黎得更緊要,好開心見到大家都搵到合適嘅伴侶(包括我自己)
今年另一個開心位係去左歐洲探索同探探一d老朋友,包括自己嘅前助理,見到佢地都活得開心、自在我就高興,其實我一直認為香港人只要努力、擺正心態,去到邊都會搵到發揮空間。
呢幾年出世界紛亂,今日唔知聽日事,好多朋友,街坊又突然過身或離開生活圈子,所以見得到會盡量見,但我對時勢發展又真係唔會太悲觀,因為歷史就係循環不息,生命亦會自己找到合適嘅出路,好好渡過2025 ,希望2026再同大家回故。