2024叱咤感想(其實好多觀點喺Threads上都好多人講咗，純粹記錄返自己感受) 首先可以喺同一個頒獎禮見返容祖兒同鄭秀文上台攞獎，對我嚟講真係一件好值得激動嘅事，始終我都做咗差唔多廿年祖迷^_^(但英皇可唔可以比佢休息下，係咪想chur到佢唱唔到歌收山就唔再理佢)。Sammi成段得獎感言好感人，可以喺現場唱返當年因為冇實體頒獎禮而唱唔到嘅《我們都是這樣長大的》，本人喺電視前都眼濕濕。 雖然我唔係Jay Fung的fans，但係平時喺903聽到佢嘅歌都覺得幾舒服，見到今年AP後都好期待佢可以吐氣揚眉掃曬啲大獎返嚟，但賽果出到嚟真係令人好唔舒服。陳卓賢今年的確做咗好多好歌，演唱會我都真金白銀入場睇咗，佢完全值得喺今年叱咤拎到獎，但唔知係咩原因(局長效應/大國課金/...)都好，你要造個獎比佢，都老老實實播夠咁多次，而唔係夾硬調獎(商台計算結果同民間計算總係有落差，但多數都差距不大，好似今次咁真係好難接受)。 相對返今年Dear Jane拎組金我都已經唔太樂見，兩首歌都唔係咩高汁作品，同埋都真係想The Hertz上到台拎獎，但人哋起碼真係播足咁多次去造就呢件事...(下續)