叱咤我最喜愛呢個投票模式喺現行制度之下，係一定唔會反映到現實情況。 以前根本無呢種咁誇張嘅貼錢追星風氣，當然可以當抽sample咁assume入場觀眾可以代表一般大眾口味（就算有fans club，以前咪最多坐一忽仔），但而家嘅現實就係嚴重傾斜。 成日有人話粉絲可以真金白銀咁「支持」心儀偶像，咁係真嘅，但當件事係包括真係銀彈攻勢咁投票同入場，就已經係玩爛咗現行制度下嘅漏洞。 但你問我點樣可以「完善」機制，我就真係諗唔到，因為商台係極難真係做到一人一票（私隱問題都玩死啦），講到尾就係要「自律」，只要有一個人可以代表幾票時，就已經令到件事唔再有可信性，咁贏到又有咩用呢？