分組活動 細個無論係讀小學定中學，係早於我有自己係同性戀嘅概念之前，我啲同班同學似乎比我更早確認我呢個身份，「乸型」、「基佬」呢啲term都聽慣聽熟。小學、中學時，由於最受人歡迎嘅男仔，都係啲運動型、比較外向、粗豪嘅type。而我最恐懼嘅，就係分組活動嘅時候，因為老師都係叫同學自由分組，而我永遠都係俾人揀剩嗰幾個，儘管我絕唔係free-rider，而且亦樂意做比人做多一啲。幸好，讀書時期，最friend嘅朋友，大部份都係女同學，同少數幾個後來都come out咗嘅男同學，到而家都仲有聯絡。 呢種俾人孤立嘅感覺，令我到做咗老師後，凡親有分組活動，如小組討論同匯報等，我都要求學生每次同啲未合作過嘅同學一組，學下同不同嘅同學合作，唔可以同死某幾個人一組。呢個宗旨除咗乎合公開考試，都要同陌生人一齊考小組討論外，亦乎合第時學生上大學、甚至出黎社會工作，都係要不斷去適應新環境，同新認識嘅人合作、共事。 除了要決心打破班上嘅小圈子外，更大嘅原因，係我都親身見到一啲有特殊學習需要嘅同學，如自閉、或有社交困難，佢地往往都俾人孤立，返學完全體會唔到群體生活嘅好處。 我係佢地身上見到自己嘅影子