呢幾日陸陸續續見到有街客，甚至係本身對Anson Lo反感嘅人，因為佢叱咤嘅表現而改觀，見到話就算本身唔鍾意佢嘅style，但都讚賞佢對表演嘅認真投入同專業，聽到呢種評價，對於我嚟講真係開心過攞到幾多個獎。 盧瀚霆經過呢幾年嘅努力鍛鍊，非常唔容易先令大家對佢改觀，當然好明白神徒一定好激動，我都係！ 不過我好記得2021年1月1呢一個叱咤開場表演，就係呢一幕令我慢慢由路人轉粉，當時喺海外冇人喺側邊吹奏，自己慢慢搵片睇，然後慢慢跌入深坑。 所以我成日提住自己，無論幾興奮幾激動都好，都要好好克制自己唔好太過長篇大論、太hard sell嚇走啱啱先改觀嘅街客，俾啲時間人哋慢慢消化、慢慢發掘。 記住，每個成為神徒之前嘅人都係街客，街客其實唔會將咁多飯圈嘅是非放喺心上，一般人哋睇表演真係想娛樂消閑，盧瀚霆努力做好自己娛樂大眾，我唔想辜負佢咁辛苦做出嚟嘅成績。