續1 卡夫卡嘅老豆赫曼．卡夫卡（Hermann Kafka）係一個白手興家嘅商人，喺little卡夫卡出生前一年就開咗間服飾用品店，叫做「赫曼．卡夫卡時尚用品店」，用烏鴉作為店徽，因為捷克話嘅「卡夫卡」就係指烏鴉。你依家都仲可以搵到呢間鋪頭嘅痕跡，就係今日老城廣場八號嘅Hotel Goldhammer，佢嘅外觀係粉紅色，非常搶眼。 卡夫卡嘅母親朱莉・洛雅（Julie Löwy）嗰邊就係做釀酒商。 總之，父母嘅事業都好忙，經常都唔會留喺屋企，使得little 卡夫卡嘅童年係由保母湊大，無咩機會體驗父母嘅愛，而老豆往往只會喺little 卡夫卡面對展露令人窒息嘅威嚴。 喺講述卡夫卡嘅人生之前，我哋先講講卡夫卡同佢老豆嘅關係先，因為佢哋嘅父子關係，對於卡夫卡寫作非常重要。 卡夫卡嘅老豆係一個性情剛烈嘅人，對於教養非常嚴厲，佢就好似一個高高在上、不可違抗嘅皇帝，佢話一就一，話二就二，係一個小小嘅屋企，根本無人夠膽違抗佢嘅旨意。卡夫卡嘅老豆就係呢個家庭當中唯一嘅正義，正義以外，就係錯誤。

Thx