《關於我在北極養雪橇狗的這件事 - 5》 估唔到我老細咁出名，個個職員都知我要搵邊個。果度人口得幾千人，稍微出名啲應該真係全個城都識你。佢哋好熱心幫我再打過電話，可能係直接打私人號碼？好快打通咗。 X，原來我老細完全唔記得咗要嚟接我，話做埋手頭上啲嘢就會過嚟。 呢單嘢我明白到，去旅行計劃唔夠周詳真係會玩死自己，實有機會遇到意想不到嘅情況，唔係次次咁好彩有人幫。 如是者等咗個零鐘，有個著住雪地工作服嘅60-70歲短髮灰髮女人入左黎機場，為方便，之後稱呼佢老細J，明明大家素未謀面，但係一眼佢就知係我。當然啦，機場啲人都走曬，得返啲staff同埋我呢個生面口，實認得啦。 自我介紹完，寒暄幾句，叫我將行李擺上車，然後開車返營地。 果陣落好大雪，唔揸得太快，行左半個鐘左右，老細J喺間木屋仔側邊停低咗架車。喔，原來已經到咗。佢指一指間屋，叫我擺行李入去同執下佢，話係比我住嘅，佢搞埋啲手尾先過嚟同我介紹工作環境同內容。（真係成間屋我住晒😂） （待續）