24000蚊的幸福 話說仲係香港嘅時候行過金魚街見到間寵物鋪就行左入去，個陣時都無諗過要養隻貓，（因為都知道有一日要離開香港）漫無目的望下啲貓睇下有乜品種，點知零零舍舍有一隻藍眼白色英國短毛貓望住我，個刻對望左一陣好似俾佢電左一下嘅感覺，我當時心諗係貓仔都係想搵人玩，當我行完間鋪準備走既時候經過佢隔離我聽到佢喵～～左聲，我停低左望住佢，佢係個箱入面向我撲過來，我就搵鋪頭職員問可唔可以拎佢出嚟俾我摸下，點知道佢一出左嚟之後就唔肯俾我走，實在太可愛啦，又俾抱又俾摸肚又咕嚕咕嚕咁真係頂佢個制😍 我問職員幾多錢：「24000！隻貓係藍眼金漸層依家係白色不過愈大就愈金架！」 當時嘅我只係領養過唐貓都未見識過啲什麼乜乜名種貓，見佢都係一隻白貓使唔使咁貴？腦海經過一段時間去所謂理性思考過後（其實仲同緊隻貓玩緊），跟住我就同職員講：我無信用卡喎，可唔可以EPS? 職員話：緊係得啦！買埋糧同貓砂？加100蚊有埋貓籠！」 就係咁聽職員嘅講解後，我就俾錢拎埋啲嘢同隻貓返屋企。雖然我知道寵物唔應該買要領養，亦知道我俾錢係幫人出糧交租，但就因為生活有時候需要一些衝動就為推自己一把或者會更好。有限字數下篇繼續⋯