《關於我在北極養雪橇狗的這件事 - 6》 「咚、咚、咚」 一開門見到老細J，隔離企左位目測40-50歲嘅女士。老細J同我介紹呢位係同事M，當日朝早先啱啱嚟報道，依家一次過帶曬我地兩個行下介紹下工作環境同內容。 呢度地方好大，有幾間木屋，有大有細，一間就我老細住嘅，幾間比客人住，一間細嘅比我住，仲有間就係廁所加沖涼。至於同事M就好似係本身特登嚟Inuvik旅居，住喺town入面，住到悶悶地先申請嚟搵嘢做下。 除咗木屋外，仲有個位用嚟養狗。一個木搭離地幾米嘅平台，大概個半至兩個籃球場咁大，用鐵絲網間開做十幾個籠，每個籠一至三隻狗，入面有狗屋比啲狗休息。平台中間仲有間屋仔，主要用嚟儲存同準備狗嘅食物。 至於工作內容，呢度係提供住宿同埋玩雪地電單車/雪橇/雪地露營等等嘅服務嘅旅館，我兩個老細，老細J同埋佢老公（老細O）係負責人，然後其他運作就係靠義工維持。 我哋義工嘅職責包好多嘢，例如執房鋪床倒垃圾洗廁所打掃衛生入油鏟雪斬柴搬嘢喂狗鏟屎鏟尿制止啲狗打交等等…基本上人同狗嘅起居飲食都關我事🙃 (待續)