除咗賣車，人生仲有好多無聊小事可以做。 話說時常會去泊車食飯嘅舊區，附近有個垃圾站，清潔工人推住沉重嘅垃圾車，需要穿越狹窄嘅行車線先至能夠抵達。幾年前，呢度更加發生過交通意外，引致清潔工人死亡，所以早幾年已經試過一次派發紅色閃燈俾工人，但係隔得太耐我都忘記咗跟進。 今次試一試轉做唔洗電芯嘅反光手帶，雖然喺冇光嘅情況底下絕對唔會著，但車頭燈照到嘅時候反光效果都幾好，希望幫到清潔工人，特別是負責倒樓同舖頭嘅私人垃圾佬，佢地同食環署官方外判工人唔同，係冇任何防護裝備，黑衫黑褲垃圾袋又黑色，夜晚好多時都睇唔到佢哋。 除咗見面親身交俾佢哋，我準備咗幾條黐喺垃圾站門口，幾日後返去睇，原來真係有人啱用攞咗，咁我之後會再補貨，或者去其他地區再做都唔定。