一直諗究竟咩係愛一個人，婚姻究竟係咩，點解自己會唔想結婚，點解會覺得所謂同另一個人相伴到老係一件可怕嘅事。有人會係世俗上覺得對大家有保障、覺得經歷好多好愛大家、覺得相處得合拍冇拗撬、覺得遇到對的人。 又或者咁講，我經常問身邊嘅人點解會想結婚，點解你會認定佢就係嗰一位？答案都只係覺得共同生活上冇太大問題岀現、覺得差唔多時候，反正最後都係要結？更有因為驚失去所以想綁住、驚錯過咗就再遇唔到「更」好嘅人。 反思過去嘅每段關係，我覺得開始搵到屬於我嘅答案。原來我一直追求嘅並非柴米油鹽，對於我嚟講一個人嘅生活更輕鬆自由，矛盾嘅係我享受孤獨又嚮往愛情。 愛情？原來我心目中嘅愛情係遇到除咗生活上照顧包容到自己嘅人，更希望係永遠都尊重同聆聽到大家、三觀同靈魂交流到、理解及滿足到大家嘅好奇心、理解我嘅奇怪又可以討論天文地理，無所不談。你話如果遇到一個咁樣嘅人，何嘗又唔想同佢相伴一生呢？前提係兩個人都要有自己思想、足夠愛自己、了解自己，兩個獨立有趣嘅靈魂碰撞等同於一加一大過二。並唔係害怕孤獨嘅靈魂遇上需要被愛嘅靈魂。 我希望會等到呢個人出現，不將就，因為我值得。