24000蚊的幸福.續.（2） 當我收到去加拿大通知之後就即刻上網睇點帶寵物離港，因為基路仔係一家人係我第二個女！ 約時間帶佢去睇醫生，要做身體檢查同埋評估佢飛唔飛得之後就係打瘋狗症針，所有文都處理好跟住要買個上得飛機既貓袋，我要佢坐我腳底唔要寄倉所以就要打去航空公司訂個寵物機位。係屋企既時候我就打開個貓袋放係地下俾佢自己適應下，大概過左兩，三個星期左右佢自己已經入左去訓教。 直到要飛個一日，去到機場入到離境大堂之後發現班機延誤，咁就係離境大堂度一路等等等，最後等到班機都取消埋，之後又搵航空公司睇吓點處理，基本上又等左2，3個鐘，後來就安排左附近酒店俾我地入住，亦都好好彩酒店隻眼開隻眼閉咁俾我帶埋基路仔上房，上到房之後真係個人散晒之後就即刻打開個貓袋放基路仔出嚟，出到嚟之後佢真係出奇地放鬆一啲都唔緊張真係佩服左佢，就係咁係酒店住左兩日終於有返個起飛時間啦，到離開酒店既時候我就同基路仔講：「你一定要屙埋屎屙埋尿呀！如果唔係你之後要等好耐先有等屙！」（因為出發日開始就無屙過真係擔心！）估唔到就係我講完個一刻佢自己就走左入砂盤就屙晒俾我睇，呢一刻我真係感動到喊左出嚟！字數有限⋯