分享少少好得意嘅現象就會發覺香港教育幾難做。 我小朋友係讀happy 津school，聽聞一直以黎初小幾乎無功課，有都係下午功輔班做完，默測考都係基本量，主要做group project，經過幾屆畢業生後發覺銜接中學面對相對「正常」功課量佢地好多畢業生都感到吃力，同埋要追返段距離。所以咁岩今年開始小一加返適量功課（每日三四項，約1-2版），開學到而家中英各默左三四次，小一全年無測考（只有唔話俾家長知嘅評估，份工作紙似小測），我唔知對比正常或一線小學差幾多。但有趣嘅係有家長反映好多功課😂入得呢間學校就係鍾意佢無功課，有啲話對比起佢家姐阿哥以前讀得咁開心，而家要跟功課同溫書所以好大對比同埋有啲吃力。 我覺得學校改變政策令舊生家長感覺落差大都好合理，不過事實如果你要係香港教育制度泥漿摔角，點都要學吓適應呢套遊戲規則，同埋點樣係中間攞平衡，我其實都唔想小朋友先甜後苦，加上仲未玩新嘅呈分比例，應該到時都會怨聲載道🥺