朋友Alan係舊同事，辭工後創業做咗房地產服務商。而家算係一間中小企，公司規模大概四五十人。 新年聚舊，佢話要同我呻感情嘢。聽到嚇一跳，以為佢同老婆有問題。聽落先知原來係佢公司兩個同事拍拖搞翻咗。男女都係卅頭，好幫得手。而家好頭痕。 男嘅係Sales阿頭，唔只自己跑數叻，仲帶到啲靚跑數，識管人。女嘅係公司開國元老，好似踢波個自由人咁前中後都幫到手。由搞網頁到湊客營運市場推廣裝修工程咩都得，而且好有人緣。 大概年多前，男嘅加入公司。唔知係郎才女貌定係姣婆遇着脂粉客黎形容，總之就撻着咗。兩個都係醒目仔女，公司拍拖嘅事梗係唔俾人知啦，直到近排搞翻咗就浮面。 男嘅就開始挑剔女嘅做事手法，話佢對人不對事，再加上少少語言暴力。女方都唔弱，開始運用自己嘅人脈圍爐打壓男方。事態發展到水火不容嘅地步。 公司管理層當然激到嘔血。理智話俾大家聽，兩個起碼要炒一個。如果要服眾，應該兩個都炒晒。但又理智上大家都知呢個年頭，市況艱難，公司能夠搵到個幫得手嘅同事打仗唔容易。 可惜，事實擺在眼前，而家1+1少於2。咁二選一，手心手背都係肉，都唔知點揀。 只能夠聽吓Alan呻，冇咩意見俾到佢。