西藏+尼泊爾紀錄8 Day 3夜晚終於到拉薩，明明正式行程啱啱先準備開始，但係我哋已經好攰啦😂 托賴Bho嘅萬豪會員，我哋淡季住St Regis仲有得升級套房，又有獨立製氧機，安全感十足，Bho一入房即刻要扮虛弱試下玩部制氧機先，佢終於得償所願可以插鼻喉影相打卡。 大鄉里如我係好少住靚酒店，但諗起我哋捱咗廿個鐘火車，係應該對自己好啲既！況且呢邊St Regis先900幾蚊人仔一間房，真係好抵住😂 我哋最後一個團友安怡終於勝利會師，佢唔想搭火車，所以自己去成都搭飛機過黎拉薩，唔知點解，香港既機票網係搵唔到去拉薩既機票，佢最後係大陸網度買，勁驚上唔到機😂 OK最後冇事！值得慶祝！所以呢晚我哋諗住去八廓街搵打邊爐，八廓街係拉薩最繁華既旺區，乜都有，但因為係古城區唔畀車入，我哋ON99係酒店call嘀嘀過去，畀左十幾蚊點知5分鐘車程即係轉個彎就放低我哋，落車搵咗一輪先知原來八廓街要自己行入去😂夜媽媽係古城區行咗10幾分鐘先到餐廳，好彩馬氏老公睇地圖一流，鴨仔們安心跟隊。 食咗田村酸湯牦牛火鍋，本身想叫酸湯，但因為有人唔嗜酸又冇得鴛鴦，所以揀普通牛骨湯，都好味！ 西藏