已移民幾年嘅家姐，一家四口趁新年返嚟一個月，住喺我屋企。今日姐夫同兩個小朋友去街，家姐要處理私務冇去，成朝得返我同佢喺屋企。 如是這般，我同佢各做自己嘢，偶爾大家吹兩句水，午飯時間一齊淥公仔麵，兩條友同枱食飯，食完爭下廁所，佢開薯片食，我又老笠佢幾塊。 彷彿回到十幾廿年前，大家仍然同一屋簷下的時光，每一天平凡又平淡，日常到不能再日常，但驀然回首，再熟悉卻已經好遙遠⋯⋯ 幾年前動畫《學園奶爸》，其中有集內容我已經唔記得，只有大概印象，係主角感慨弟弟長大後會有自己嘅人生，一生中可以弟弟一齊生活嘅時間，其實好短。我記得嗰集並唔係特別煽情，但主角呢一小段感觸，喊咗我好耐。 細個覺得兄弟姊妹住喺同一個家、一齊生活，係好理所當然嘅事。大個咗，先發覺假設我80歲命，其實可能得30年係同佢哋一齊過，連一半都冇。 好好珍惜跟親密嘅兄弟姊妹一齊生活嘅日常吧！