呢排少咗聽中國講「一帶一路」，政策本意係想通過基建投資拉近各國嘅經濟聯繫，增加中國喺全球嘅影響力。不過特朗普即將上台，其對華強硬政策、新冠疫情下嘅全國封鎖同基建援助東南亞國家嘅結合之下，中國自己似乎無意中「攞起石頭揼自己腳」。 一帶一路，中國幫東南亞國家（如越南）修橋補路，表面風光。基建做好咗，越南同其他東南亞國家突然成為咗外資眼中生產鏈嘅轉移重地。地理位置方便、人工平過中國，加埋基建改善，大量低端製造業從中國大規模外流到呢啲地方。講白啲，中國自己攞錢幫人鋪路，結果人哋攞晒好處，自己啲工廠倒執，成件事真係唔太抵玩。 特朗普同中國開展貿易戰，向中國加關稅、封鎖技術，搞到好多外資企業覺得喺中國生產風險太高，索性將生產線搬去越南或者印度。中國自己嘅製造業呢？一方面面臨外流，另一方面喺技術封鎖之下發展高端產業又舉步維艱。 疫情期間，為控制疫情，中國採取咗「動態清零」政策，一封城就封成個月，物流停晒，工廠做唔到嘢，貨運仲卡喺港口出唔到國。呢啲措施喺疫情初期有效控制住病毒，但經濟代價好大。外資企業開始驚，覺得唔可以再將單一供應鏈放喺中國，趁機加快向東南亞國家轉移。最後越南、印尼成最大贏家。