近日實在太多新聞，運晨客似乎意識到阿公幫緊狗狗超渡，有唔少公公婆婆上前道謝，阿公仲收到幾封利是。 （唔知點解老人家會隨身帶備利是封） 唔通阿公突然繼續超渡，係為咗收利是？ 如果呢個係我寫嘅懸疑小說，阿公一定會喺晨運客中發現毒狗兇手，佢會用符咒令佢百鬼纏身，或者我直接用桃木劍幫佢物理超渡。 但可惜，呢個唔係故事。 離開之後，我問阿公點解突然繼續唸咒。 阿公話，道士可以施法超渡靈體，仲可以慰藉人心。 佢想令其他人知道，有人著緊呢班無辜受害狗狗，有人會因呢件事而傷心，呢個社會出現呢種慘劇，唔會冷漠對待。 其實我一直都唔明，點解有人會咁唔鍾意貓狗，憎到要毒殺佢哋？！ 阿公話 兇手唔一定憎恨貓狗，佢只係想做壞事無後果。 呢種人喺現實社會係失敗者，只敢向弱勢，無辦法反抗嘅小動物發洩。 （2/3)