見到呢篇，諗起喺香港時都請過幾年工人姐姐，大家合作愉快，相處融洽。 除咗篇post講嘅點，我哋仲有做到以下幾樣嘢： 1️⃣ 清楚規定放假同工作時間 → 放假唔需要理屋企嘢，早返夜返都ok，只要趕到尾班車返到屋企就得。 → 每日最長朝8晚8，夠鐘即刻可以入房，夜晚絕對唔會打擾佢。 2️⃣ 用家電減輕負擔 乾衣機、洗碗機、無線吸塵機、IH爐、蒸機等等，令家務輕鬆好多。 3️⃣ 幫佢做好準備 → 頭一日來幫佢鋪好張床，準備好生活用品，令佢感覺到自己係被重視嘅。 → 整咗一本簡單手冊，寫咗： • 家居守則 • 日常家務schedule • 家人/醫生/學校聯絡號碼 • 各種電器嘅簡單介紹 等佢可以自己睇返，快啲上手。 4️⃣ 尊重佢嘅飲食習慣 工人姐姐有時放假會買啲佢鍾意嘅食物返嚟，雖然有啲我唔太識食，但都會試吓。日常同枱食飯，但平日我煮飯多，間中由佢發辦，煮家鄉美食。 5️⃣ 好好溝通 再唔鍾意都唔可以發佢脾氣，有問題就慢慢解釋清楚，問返佢意見同感受。平日多啲傾偈，當文化交流都好有趣。 工人姐姐