有時候影婚禮，我會被要求幫下家中某位長輩影張單人相，最好係純色背景，我一聽就明，唔會問點解，只會好爽快一句"好呀"，然後既輕鬆但又好認真咁影呢張相 呢張相行內叫"精神相"，大家應該會明白係咩一回事 長輩著住靚衫梳靚頭甚至化好妝，係影張靚相嘅好機會，所以有啲家庭，係會要求我哋幫手，當然唔會講明用意 有一年，一位舊客轉介一位準新娘畀我幫手影佢嘅婚禮，婚禮辦得好急，因為新娘媽媽正病重，我答應一個禮拜內執好所有相同片交畀佢，唔需要額外加錢 呢個婚禮，其實新娘媽媽都出席唔到，只有數圍新人嘅朋友 宴會完咗，我建議再搵一個寧靜嘅地方，幫新人錄一段短片，好好感謝媽媽，亦為媽媽打氣 呢短短幾分鐘，新娘每一句說話都觸動到我，拍完，我都冇時間沉澱心情，返屋企即刻開快車希望可以盡快完成任務 兩日後，我收到新娘whatsapp：Frankie，多謝你幫忙，你可以唔需要咁趕了…… 除咗送上安慰，我亦冇停止進度，我想繼續履行我嘅承諾 剛剛讀到一篇post，po主家人面對至親患病，恐怕出席唔到婚禮，所以我想起呢段往事 確實一家人齊齊整整，比一切都重要，希望文中主角，一切順利安好 尊重po主，我唔引用文章了 攝影