20250209 三姊妹與哥哥和一隻蟋蟀 黑龍劇團昆蟲系列嘅第二部曲，同《曱甴》一樣係潘sir嘅劇本，今次所有演員甩晒劇本，掛演讀劇之名、行舞台劇之實，製作相當有誠意。 劇名交代咗故事就係圍繞大哥、三姊妹同蟋蟀，四個角色重視嘅嘢唔同，引致好多矛盾：大哥掛住蟋蟀唔理屋企；大妹擔心屋企滲水想殺死蟋蟀；二妹不問世事淨係同三妹做伴奏為樂；三妹就掛住Vincent同棵萬年青，並且幻想蟋蟀軍團要毀滅世紀末最後一棵萬年青。劇中好多場戲都疊聲，你有你講佢有佢講，雖然身處同一個屋企但並無有效嘅溝通，直到最後三人終於肯進入大妹嘅世界，合力解決咗屋企嘅問題同佢哋之間嘅衝突。最後一幕舞台中央係一棵置於水桶內發光嘅萬年青，配合周圍吊住著燈嘅水樽，畫面好靚，讓人感覺到溫暖同光明。 好想大讚舞台設計，成本有限但呈現到好豐富嘅畫面，發光地墊同水樽燈非常出色，而且加插咗《大懶堂》、《夢中人》等歌曲亦生色不少。 最後好佩服 @alma.meow 自資搞劇團，自導自演三套劇，而且擔當起橋樑嘅角色，令觀眾認識更多好演員，睇過佢哋演出就知道台上台下嘅每一個人都唔會辜負觀眾，嚟緊仲有一套希望大家會入場支持。 記住光明