連續兩個禮拜去咗附近鎮搞嘅農曆新年活動。上星期喺Maidenhead，今個星期喺Wokingham。 Maidenhead嗰次喺圖書館出面封咗條路，放咗抽好長嘅炮仗就喺度舞獅。沿路舞落去有架food truck，車身寫滿港式潮語，亦貼咗香港加油貼紙，叫Dad is cooking。對面有檔臨時茶水檔，係大樹下合作社，兩個前區議員搞嘅。 今日喺Wokingham，Town Hall出面好幾檔嘢食都係香港人擺檔，主打雞蛋仔同格仔餅嘅喜快多人排到癲。空地搭咗個台仔，未到重點嘅舞獅前，有雷丁港人合唱團暖下場。 之後Mayor出場講兩句，就話自己廣東話唔好，搵咗做緊Wokingham區議員嘅前香港區議員吳兆康同大家打招呼。 再諗起尋日喺London嗰四千人，我都幾有信心宜家過嚟英國嘅香港人，唔再係以前移民嗰種華僑，喺唐人街圍威喂。大家都好努力去融入社區，一邊學習，一邊貢獻，一邊sell下舊香港有咩好。 // 有冇一種可能係 咁啱行緊嘅呢一段 係喺歷史嘅中段 終點係喺好後面 你係唔會見到 但最終係會出現 // 《散步之年》MLA