話說琴日跑完衝線嗰下見到啲Helper派選手包 就諗起好多年前一個故事 讀緊大學嘅時候有一次渣馬搵Helper 見到都有$50 一個鐘 然後類似凌晨做到第二日朝早 你當有$500人工 工作內容其實都好簡單 成班男仔不停搬搬抬抬 然後就將嗰啲選手包分類入袋 做到天光其實都完成得7788 正當個人冇乜瞓覺開始有少少魂遊太虛 跟住聽到Helper判頭話有老細嚟睇進度 再隔咗少少時間 突然之間嗰個判頭就大聲鬧其中幾個男仔 應該都係個別有啲掛住玩但係做嘢唔夠快 但係最搞笑就在於唔知點解叫晒所有Helper起埋一齊 突然之間當住老細面前問我哋 「你哋咁樣嘅工作態度好唔好意思收呢份人工」 我已經滿頭問號 諗緊點解好似返返中學 仲要其實唔係好關我事但係又要成班人企埋一齊 跟住佢再講多句 「不如咁啦你哋唔好收呢$500啦」 雖然我表面仲係好冷靜 但內心已經想講粗口 諗緊係咪啲入咗求職陷阱 想報警但又唔夠膽出聲嗰隻 當然最後我係有出到糧嘅 後尾諗返應該係老細有啲地方不滿 個判頭就做場大龍鳳 射個波比我哋 諗返都搞笑