根據我多年經驗，想快啲賣樓同價錢好啲，最好吉屋、搬清雜物、翻新油牆。 當我想賣樓，我會提前一個月通知租客，同埋補多一個月租金，通常佢哋都會樂意配合，搬乾淨間屋，我可以即刻搵人油油，你好我好。 放盤我會留匙俾代理，佢哋自己帶客上門睇樓。因為多數客都係齋睇，我同啲代理講：「你自己上去睇，唔駛打俾我，啱先搵我傾。」我識做時，代理都識做。 曾經我有個三房單位，代理帶客睇完打俾我：「個客有興趣，但呢個係三房，佢哋想要兩房，咁佢哋買返嚟要重新裝修，可唔可以……」 呢啲手法好低莊，我即刻落閂：「其實我間屋係新裝修，間格唔啱用就唔好考慮，不如帶佢睇啲兩房單位，留返俾需要三房嘅人啦。」 試過有個阿媽幫個女睇樓，代理傾好價錢，叫我過嚟簽約。阿女係首置，簽完臨約我同佢哋握手：「恭喜妳成為業主！」阿女一時反應唔切，我再話：「妳有個好好嘅媽咪。」 好多時代理都會預兩個月成交期，但萬一有咩東瓜豆腐係唔夠嘅，我會主動提返買家：「你搞按偈最好預長啲，不如寫三個月啦，有多到時可以提早，唔夠就麻煩。」 將心比己，買樓從來都唔容易，肯虛心受教嘅，我好樂意分享我嘅貼士，因為喺我生命裡面，我同樣感恩遇過好多貴人。