[得罪Agent系列] 儲蓄保真相 首先搞清楚所謂嘅儲蓄保，佢嘅真身係終身人壽保險（Whole Life Insurance）。顧名思義只要受保人健在，交齊保費或者已經供完的話，保單就會一直有效，直到受保人百年歸老為止。 除咗保障之外，保單仲有現金價值。保費除咗用嚟支付保險之外，餘下會交畀保險公司去投資，積累現金價值，所以先叫做儲蓄保。 投保前一定要計算清楚負擔能力，因為供款期通常以年計，甚至長達幾十年。而且頭幾年嘅退保價值更有可能會少過已經繳交嘅保費，即係有機會倒蝕！ 講到回報，雖然經常聽到agent聲稱儲蓄保有6-7%年回報，但要留意呢個係講緊幾十年嘅預期回報，並唔係百分百保證。以下幾個因素都會影響實際表現： 1️⃣保險成分：保單保障越高，越多保費會用嚟支付保險成本，相反越少保費用作投資。 2️⃣保證回報：保證回報越高，總預期回報會越低。如果非保證回報比較多，就要考慮保險公司嘅實力同誠信 3️⃣佣金利潤：羊毛出在羊身上，經紀佣金同埋保險公司利潤都會蠶食保單回報 4️⃣投資策略：保險公司投資風格唔同，保守定進取都會影響回報。 你覺得儲蓄保抵唔抵買？歡迎留言分享！