我同我父母關係係平等嘅，唔啱照直講，又好彩佢哋肯聽肯改，一家人無隔夜仇。 有次我發現銀包少咗張五佰蚊紙，我諗嚟諗去都諗唔到用咗去邊，之後我問我老公：「你有無喺我銀包拎過五佰蚊？」 佢：「無喎，唔見咗錢？」 我：「係囉，少咗張五佰蚊。」 佢：「有無問姐姐？」 我：「應該唔會係姐姐攞咗啩，就算係佢都唔認啦！唯有以後小心啲。」 過咗兩日，我即管試吓問我媽：「妳有無攞過我五佰蚊？」 仆佢個街，佢竟然答：「有呀！」 我即刻嬲到爆炸：「妳偷錢！報警拉妳呀！」 佢：「五佰蚊之嘛，俾返妳囉！」 我：「妳仲好意思大大聲？重點唔係幾錢，係妳攞咗唔出聲！我仲懷疑姐姐，妳知唔知我差啲報警？如果我真係報警，差佬係拉妳呀！」 佢：…… 我：「條氣唔順呀？依家話錯妳咩？妳唔出聲就係偷錢，仲害我冤枉好人。我唔係介意嗰五佰蚊，我係介意妳無家教！妳自己反省吓啦！」 佢：「……一時唔記得啫。」 我：「妳攞咗錢是旦留個言，或者寫幾隻字，我唔睇就係我問題。但依家妳係偷錢，調返轉我下次喺妳銀包攞咗錢唔出聲，妳唔好話我呀，我學妳咋！」 佢：「以後唔會囉。」 我：「下次我真係會報警，我話嘅！」 佢：「知道喇！」 咁我就無再嬲喇。