《多謝你一直都咁努力》 ⁡ 2012年，我確診咗紅斑狼瘡症SLE，當時我係第一屆DSE考生！病咗之後身體差、集中唔到精神，高劑量類固醇又令我夜晚瞓唔到覺，都預咗DSE考得唔好。 ⁡ 2014年，我重讀，SLE又令我血管收窄，導致我 肺栓塞，之後出現咗後遺症，其中一邊肺脹唔起，有半年時間都要喺屋企聞氧氣，當時已經對DSE打定輸數，但我仍然堅持考試✊🏻 ⁡ 2016年媽咪俾咗第三次機會我，俾我考多次DSE！其實壓力好大，因為我知道係最後一次機會！嗰段時間我好努力keep住身體穩定，點知臨門一腳喺考試途中屙血尿、腎炎入咗院！去到要考選修科都嘅時候都出唔到院，所以喺醫院完成咗第三次DSE！ ⁡ 上到大學唔代表個病一勞永逸！病發完又病發！5年前我確診咗個罕見病令我需要揸拐杖、用尿喉，生活上諸多不便！ ⁡ 其實一開頭我都接受唔到有個尿袋，但我會覺得既然唔發生都發生咗，都要接受✨個天俾得呢個任務你，就預計你搞得掂😌我ok㗎！ ⁡ 而家醫生想我學定電動輪椅嘅操作，就係因為預知未來我對腳嘅情況可能會變差，醫生話學定差唔多！ ⁡ 呢13年唔容易❤️感激自己，即使遇到咁多困難/難題，我都仍然努力生活緊！