你問我，我由細到大，都無「仇富」嘅心態。 睇富二代、富三代啲花邊新聞，無可否認我都會追睇，但我唔會幸災樂禍，因為酒色財氣係佢哋應份嘅。 啲人會話：「佢老豆/阿爺有米，先淨落咁多之嘛！」咪就係咁囉！ 例如今期爆紅嘅馬家，偶然睇新聞得知，佢伯爺喺67暴動之後大手買地，後來水漲船高，升價百倍。 喂，67暴動之後夠膽買重貨，抵佢贏㗎喎，我好佩服佢咁有膽色呀！即係換轉喺2025你敢瞓身買樓，話唔埋你啲仔呀孫呀都可以日日玩車玩女，躺平唔係你發達嘅終極目標咩？然後成班網軍酸民世世代代仲住緊簡樸房喺鍵盤前打飛機。 你可能會話：「萬一香港玩完咪仆街囉！」係㗎，但正如當年邊個有水晶球預測到67暴動之後香港會變成點？或者你阿爺當時同依家嘅你一樣，笑緊入市嘅人戇鳩呢。 姑莫論人哋係咪死好命，但最起碼都要有第一桶金先，機會係留俾有準備嘅人。無一個年代嘅香港人成功係容易嘅，今時今日都有好多人抄股抄幣致富㗎，又唔見你係？ 一方面笑緊啲上流人士淨係識食玩瞓屙，另一方面又呻緊幾千蚊卡數未還，邊個可憐啲？今晚早啲瞓啦，聽朝要返工。