一路去開去慣嘅茶餐廳人事變動，原班人馬另起爐灶响附近開咗另一間，我都當然跟埋去新果邊支持支持。 新舖門面固然乾淨企理，但今日俾我見到水吧廚房兩個人都一路擔住口煙一路準備食物。我估老闆應該知情但冇理會／管唔到佢哋先咁放肆响人客見到嘅位置都大模廝樣咁食煙。 當然你可以話間間茶餐廳都係咁，只不過親眼見到又確係有啲衝擊，難以接受。唔好話我咁都驚就唔好出街食，我覺得唔好一邊煮嘢一邊食煙係好基本嘅要求。 講到底，有啲人就永遠都只可以停留喺「廚房佬」嘅層次，因為呢啲人連自己都唔尊重自己嘅職業。 咁基本嘅衛生要求都做唔到，好難叫人對你嘅出品有信心。