上一代父母習慣踩底自己啲仔女，以表示自己好謙虛，咁我明嘅，所以有時唔太過分，我都由佢。 記得十幾年前，有次我媽同另一個親戚又講仔女經，對方係咁誇讚自己個女好生性，煮完飯會幫手開枱攞餸。咁我媽話：「妳就好啦，我個女連飯都要人裝埋。」 又，對方話自己個女好識諗，打算去英國留學，自己辛苦多幾年就可以功成身退。我媽就話：「妳就好啦，我個女懶到死都唔想再讀書。」 咁對方同個女全程都母慈女孝咁嘅，而我就一直黑面唔回應，喺外人眼中我係一個死女包。 忍到完席，我終於爆：「我請埋工人俾妳，我駛撚自己裝飯？我都想我老母捱世界供我讀番書，我唔做嘢妳有閪大屋住？人講妳又講，妳醒少少得唔得？」 佢意識到自己講錯嘢，唔敢反駁，雖然佢無心嘅。 我再講：「妳以為佢個女係好人？細個佢問我借錢，第二次佢側側膊一路拖，我話要話俾佢媽知佢先死死地氣還錢咋！」呢件事我無同任何人提過。 我媽先好似如夢初醒咁：「嘩乜佢咁衰㗎！」我反白眼。 反而我老豆好撐我嘅，有次親戚嚟拜年，知道我哋過年後搬屋。親戚嘴藐藐話：「又搬呀？勞師動眾。」老豆話：「阿女有本事買屋俾我享福，搬幾多次都願呀！搬完叫你上嚟坐吓。」佢好自討沒趣咁。